सप्तरी, ३ जेठ । राजविराज नगरपालिकामा नेकपा (एमाले) ले वडा अध्यक्षमा जित हासिल गरेर खाता खोलेको छ ।
एमालेका पुराना कार्यकर्ता जगदीश मण्डल २४१ मत ल्याएर वडा अध्यक्षमा निर्वाचित हुनुभएको हो । निकटतम प्रतिद्वन्द्वी नेपाली कांग्रेसका सत्यनारायण मण्डलले २३० मत ल्याउनु भएको छ ।
यसअघि २०७४ सालको स्थानीय तहको निर्वाचनमा २२४ मत ल्याएर मण्डल निकट्तम प्रतिद्वन्द्वी रहनु भएको थियो भने सत्यनारायण मण्डलले १८६ मत ल्याएर तेस्रो स्थानमा हुनुहुन्थ्यो । गत स्थानीय तहको निर्वाचनमा २९१ मत ल्याएर निर्वाचित राजपाका शोभालाल मण्डल यो वर्ष जसपाबाट उम्मेदवार थिए । उनले २२२ मतमा चित्त बुझाएका छन् ।
राजविराज–१४ को वडा अध्यक्षमा ११ मतको अन्तरले एमालेले जिते झै सदस्यहरुमा कांग्रेसले झिनो मत अन्तरले विजय हासिल गरेको छ । सदस्यहरुमा २३४ मत ल्याएर रितेशकुमार साह, २३४ मत ल्याएर हरिनन्दन मण्डल, २३७ मत ल्याएर महिला सदस्यमा रन्जनादेबी मण्डल र २२७ मत ल्याएर दलित महिला सदस्यमा मुनुवादेबी सदा विजयी भएका छन् । एमालेका सदस्यका उम्मेदवारहरु ६ देखि ११ मतको अन्तरले पराजित भएका छन् ।
यसअघि जसपाबाट राजविराज–१ मा चन्द्रशेखर चौधरी, २ मा अरुणकुमार यादव, ३ मा अनिलकुमार दास, १६ मा रामअकबाल यादव विजयी भएका छन् । राजविराज–१५ मा लोसपाबाट ओमनारायण साह निर्वाचित हुनुभएको छ । राजविराज नगरपालिकामा १६ वडा रहेका छन् ।
Add Comment