दुई दिने क्षमता अभिवृद्धि तालिम सम्पन्न, समाजमा रहेका कुरीतिहरू सबै मिलेर अन्त्य गर्नुपर्ने : नगर प्रमुख जितेन्द्र प्रसाद

राजविराज, पुस १९ गते । अनौपचारिक क्षेत्र सेवा केन्द्र मधेस प्रदेश कार्यालयको आयोजनामा शम्भुनाथ नगरपालिकामा मानवअधिकार समूहका सदस्य र सरोकारवालाहरूको लागि दुई दिने क्षमता अभिवृद्धि तालिम मंगलवार सम्पन्न भएको छ ।
कार्यक्रमको समापन गर्नुहुँदै नगरपालिकाका नगर प्रमुख जितेन्द्र प्रसाद गुप्ता कलवारले समाजमा रहेका कुरीतिहरू सबै मिलेर अन्त्य गर्नुपर्ने बताए । बोक्सी, दाइजो, बाल विवाहलगायत सामाजिक कुरीति र कालाबजारीलाई अन्त्य गर्न प्रयास जारी राखेकोे बताउँदै नगर प्रमुख गुप्ताले मिलेर अगाडि बढेमा चाँडै गन्तव्यमा पुगिने बताए । उनले शिक्षाका लागि बालबालिकाका परिवारका सदस्यलाई अभिप्रेरित गर्नुपर्ने आवश्यक्ता औल्याए ।

शम्भुनाथ नगरपालिका वडा नम्बर–१० का वडा अध्यक्ष धर्मेन्द्रकुमार मण्डलले मानवअधिकारको रक्षाको लागि महिलाहरूको भूमिका महत्वपूर्ण हुने भन्दै सबै सरोकारवालाहरू एकजुट हुनुपर्ने बताए । नगरपालिकाका कार्यपालिका सदस्य शिवशंकर रामले निरन्तरको प्रयासले मात्र सामाजिक कुरीति अन्त्य गरी अािर्थक, सामाजिक अधिकार सम्बोधन गर्न सकिने बताए ।
समूहकी देवमाया भट्टराई विश्वकर्माले महिलाको विकास, सशक्तिकरणका लागि स्थानीय तहले महिलासम्बन्धी विशेष नीति ल्याउनु पर्ने र सो अनुरूप बजेट व्यवस्था गर्नुपर्ने बताइन् । तालिममा मधेस प्रदेश संयोजक राजु पासवानले इन्सेक परिचय, मानव अधिकारको विकास अवधारणा, समाजमा भएको हानिकारक मान्यता विषयमा प्रशिक्षण दिएका थिए ।

यसैगरी इन्सेक प्रतिनिधि मनोहरकुमार पोखरेलले आर्थिक, सामाजिक, सांस्कृतिक अधिकार र नगरपालिकाको भूमिकाका बारेमा सहजिकरण तथा कार्यक्रमका फोकल पर्सन बरुण बस्यालले मानव अधिकार समूहको काम, कर्तव्य र अधिकार, शिक्षा, स्वास्थ्य, वातावरण र विभेद विरुद्धको अधिकारका विषयमा प्रशिक्षण दिए ।
सहजकर्ता विश्वेन्द्र पासवानद्वारा सञ्चालित दुई दिने तालिममा उपप्रमुख अनीता कुमारी चौधरी, वडा अध्यक्षहरू, विभिन्न शाखा प्रमुखहरू, मानव अधिकार समूहका पदाधिकारीहरूसहित ५० जनाको सहभागिता रहेको थियो ।