जङ्गली च्याउ खाएर धनकुटामा आमा छोराको मृत्यु

धनकुटा । जङ्गली च्याउ खाएर धनकुटामा एक महिला र उनका सात वर्षीय नाबालक छोराको उपचारका क्रममा शुक्रबार मृत्यु भएको छ ।
धनकुटा नगरपालिका–७ मा डेरा गरी बस्ने २८ वर्षीया मुना राई र उनका छोरा सचिन राईको धरानस्थित बिपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको हो ।
मृतकले यही जेठ १५ गते धनकुटा–७ मा रहेको चुलिवन जङ्गलबाट जङ्गली च्याउ ल्याएर खाएका थिए ।
च्याउ खाएपछि बिरामी परेका उनीहरू जिल्ला अस्पताल धनकुटामा उपचारका लागि भर्ना भएका थिए । उपचार हुन नसकेपछि थप उपचारका लागि १८ गते उनीहरूलाई बिपी कोइराला स्वास्थ्य विज्ञान प्रतिष्ठान धरानमा रेफर गरिएको थियो ।
अचानक आज मृतक आमाको रक्तचाप कम भई बेहोसीको अवस्था छाएको र छोराको मिर्गौलामा समस्या देखापरेको थियो ।