कञ्चनरुप, १८ जेठ । सप्तरीको राजविराजमा छैठौं संस्करणको राजविराज मेयर कप सप्तरी प्रिमियर लिग सुरु भएको छ ।
पब्लिक विन्देश्वरी क्रिकेट मैदानमा सम्पन्न प्रतियोगिताको उद्घाटन खेलमा छिन्नमस्ता लायन्सले कञ्चनरुप राइनोजलाई २२ रनले पराजित गरेको छ।
छिन्नमस्ताले दिएको १ सय ८८ रनको विशाल लक्ष्य पछ्याएको कञ्चनरूपले १९.४ ओभरमा १ सय ६५ रन मात्रै बनाएर सबै विकेट गुमायो ।
कञ्चनरूपका लागि रासिद खानले सर्वाधिक ४७ रनको योगदान गरे पनि जितका लागि पर्याप्त रहेन । उनले २९ बलमा तीन चौका र चार छक्का प्रहार गरेका थिए ।
त्यसैगरी दिनेश अधिकारीले २० बलमा १ चौका र ४ छक्का मद्दतले ३१ रन बनाए । अभिषेक गौतम र चित्र बहादुर बिस्टले समान २३ रन बनाए । लक्ष्य पछ्याउने क्रममा ५९ रनमा ७ विकेट गुमाएको अवस्थामा राशिद र दिनेशले ५६ रनको साझेदारी गरेता पनि जितको लागि पर्याप्त रहेन।
छिन्नमस्ताको बलिंगमा विशाल पटेलले सर्वाधिक ४ विकेट लिए । प्लेयर अफ द म्याच घोषित पटेलले ४ ओभरमा १३ रन बनाए । मोहम्मद सोहेलले ३, सुमित नेवारले २ तथा फिर्दोश अन्सारीले १ विकेट लिए ।
यसअघि टस हारेर पहिले ब्याटिङ गरेको छिन्नमस्ता लायन्सले निर्धारित २० ओभरमा ९ विकेट गुमाएर १८७ रनको योगफल तयार गरेको थियो। छिन्नमस्ताका सुमित नेवारले आक्रामक ब्याटिङ गर्दै १८ बलमा ३ चौका र ४ छक्काको मद्दतले ४३ रन बनाए।
राष्ट्रिय टोलीमा समेत रहेका भिम सार्कीले १६ बलमा ३० रनको योगदान गरे। उनले ४ चौका र १ छक्का प्रहार गरेका थिए। यस्तै, राज वर्माले २३ बलमा २६ रन, विशाल पटेलले १० बलमा १९ रन तथा रोहन विकले १४ बलमा १८ रन जोडे।
कञ्चननरूप राइनोजको बलिङमामा उमेशकुमार चौधरी र राहुल मण्डलले समान तीन–तीन विकेट लिए । उमेशले चार ओभरमा २८ रन तथा राहुलले चार ओभरमा ३७ रन खर्चिए। रासिद खान र दिनेश अधिकारीले एक–एक विकेट लिए।
प्रतियोगिताअन्तर्गत शनिबार दुई खेल हुनेछन् । बिहान ९ बजे सुरु हुने पहिलो खेल बलान बिहुल सुपर किंग्स र राजविराज राजदेवी ११ तथा दिउँसो १ बजे हुने दोस्रो खेलमा तिरहुत टाइगर्स र सनराइज ११ तिलाठी कोइलाडी विच प्रतिस्पर्धा हुने सप्तरी क्रीकेट संघका अध्यक्ष आयुष श्रेष्ठले जानकारी दिनुभयो ।
जेठ २८ गते सम्म आयोजना हुने प्रतियोगितामा ६ टिम सहभागी छन् । कञ्चनरूप राइनोज, छिन्नमस्ता लायन्स, बलान बिहुल सुपर किंग्स, राजविराज राजदेवी एघार, तिरहुत टाइगर्स र सनराइज एघार तिलाठी कोइलाडी लिगमा सहभागी छन्। राउण्ड रोबिन लिग अन्तर्गत संचालन हुने लिग अन्तर्गत सबै टिमले एक अर्कासंग १/१ खेल खेलीसकेपछि समुहको शिर्ष ४ टिम बीच प्ले-अफमा प्रतिस्पर्धा हुनेछ।
राष्ट्रिय क्रिकेटरहरु बिनोद भण्डारी, भिम शार्की, विवेक यादव, दिलिप नाथ, रिजन ढकाल, शाहब आलम, बसिर अहमद, राशिद खान जस्ता राष्ट्रिय क्रिकेटरहरु बिभिन्न टिमको प्रतिनिधित्व गर्दै खेल्नेछन्।
