सुनसरी, २८ पुस । सुनसरीको धरानबाट १ थान भरुवा बन्दुक सहित ५ जनालाई प्रहरीले पक्राउ गरेको छ ।
धरान उप-महानगरपालिका-१९ हरियाली चारकोसे जंगल स्थितबाट कार चालक इटहरी-१३ का ३५ वर्षीय ज्योतिस चौधरी सहित कारमा सवार रामधुनी नगरपालिका-७ का ३३ वर्षीय सन्जु राई, ३१ वर्षीय विनय राज धामी, २८ वर्षीय दिवश माझी र सुन्दरहरैचा नगरपालिका-२ मोरङका ४१ वर्षीय मेहरमान भुजेललाई सुनसरी प्रहरीले भरुवा बन्दुक सहित पक्राउ गरेको हो ।
शनिबार इलाका प्रहरी कार्यालय धरानबाट खटिएको प्रहरी टोलीले धरानबाट रासतालतर्फ जादै गरेको बा. ४ च ४३३ नम्बरको कारलाई चेकजाँच गर्दा कारको सिटको मुनि लुकाई छिपाई राखेको अवस्थामा भरुवा बन्दुक १ थान, गोली ५ थान, बारुद, खुकुरी १ थान फेला परेको जिल्ला प्रहरी कार्यालय सुनसरीले जनाएको छ ।
पक्राउ परेका उनीहरुको सम्बन्धमा थप अनुसन्धान भईरहेको प्रहरीले जनाएको छ ।
