कञ्चनरूप, ६ चैत । सप्तरीको कञ्चनरूप नगरपालिकामा जारी नगरस्तरीय दोस्रो मेयर कप फुटबल प्रतियोगिताको उपाधि कञ्चनरूप वडा नं. १२ ले जितेको छ ।
कञ्चनरुप-३ स्थित बरमझिया खेल मैदानमा बुधबार भएको फाइनल खेलमा वडा नम्बर १२ ले वडा नम्बर ३ लाई १-० गोलले पराजित गर्दै उपाधि जितेको हाे ।
खेल शुरु भएको पहिलो हाफमा दुवै टिमले गोल गर्न नसकेपछि खेल बराबरी भएको थियो । दोस्रो हाफको ८ औं मिनेटमा वडा नम्बर १२ का जर्सि नम्बर १८ का अफताफ अलिले १ गोल गरि आफ्नो टिमलाई अग्रता दिलाएका थिए ।
विजेता टिम कञ्चनरूप १२ लाई खेलका प्रमुख अतिथि नेकपा एमालेका पोलिटब्युरो सदस्य सुमनराज प्याकुरेलले नगद ५५ हजार कप तथा मेडल प्रमाणपत्र प्रदान गर्नुभएको थियो ।
यसैगरी उपविजेता टिम कञ्चनरूप वडा नं. ३ ले नगद ४५ हजार सहित कप, मेडल र प्रमाणपत्र प्राप्त गरेको छ । उक्त पुरस्कार कञ्चनरूप नगरपालिकाका नगर प्रमुख ललन प्रसाद गुप्ताले प्रदान गर्नुभएको थियो ।
फाइनल खेलको उत्कृष्ट खेलाडी कञ्चनरूप वडा नम्बर १२ का अफताफ अलि भए ।
उत्कृष्ट खेलाडी १२ नम्बर वडाका राहुल बिक , उत्कृष्ट गोल रक्षक १२ नम्बर कै ऐसान अलि , बेस डिफेण्डर वडा नम्बर ३ का सुमन चौधरी र फेयर प्ले एवार्ड वडा नम्बर ५ घोषित भएका थिए । उनीहरुलाई मेडल तथा ट्रफी प्रदान गरिएको थियो ।
कार्यक्रममा बोल्दै नेकपा एमालेका पोलिटब्युरो सदस्य सुमनराज प्याकुरेलले खेलले खेलाडीहरुलाई अनुशासित , मर्यादित र स्वच्छ बनाइ ब्यक्तित्वको बिकास गर्ने भएकाले खेलकुदको बिकासमा कसैले अवरोध गर्न नहुने बताउनुभयो । खेलले गर्दा अहिले नेपालको नाम बिश्वको कुना कुनामा पुग्न सफल भएको कुराको स्मरण गराउँदै खेलकुदको बिकासमा आफु दृढ भएर लाग्ने प्रतिबद्धता जाहेर गर्नुभयो । खेलकुदले समाजमा एकता, अनुशासन, र स्वस्थ जीवनशैली प्रवर्द्धन गर्ने बताउनुभयो ।
