राजविराज, २१ चैत । सुनसरीको कोशी गाउँपालिका ७ बाट अपहरणमा परेकी बालिकाको प्रहरीले उद्धार गरेको छ ।
कोशी गाउँपालिका-७ मुसहरी टोलका कुशेश्वर सदाको ४ वर्षीया छोरीको अपरहण भएको घटनाको २४ घण्टा भित्र वालिकाको सकुशल उद्दार गरी अपहरणमा संलग्न व्यक्तिलाई प्रहरीले पक्राउ गरेको छ ।
पक्राउ पर्नेमा सप्तरी जिल्लाको कञ्चनरूप नगरपालिका-१२ धरमपुरका जितुवा भन्ने जितेन्द्र साह (हलुवाई) रहेका छन ।
चैत्र २० गते बुधबार दिउँसो पौने २ बजेको समयमा मुसहरी टोलबाट चार वर्षकी बालिका अपहरणमा परेकी थिइन् ।
घर अगाडी खेल्ने क्रममा जितेन्द्रले सिटी सफारीमा चढाई अपहरण गरी लगेको सिसिटिभी फुटेजमा देखिएको थियो ।
जानकारी प्राप्त हुनासाथ जिल्ला प्रहरी कार्यालय सुनसरी र कोशी प्रदेश प्रहरी कार्यालय बिराटनगरको प्रादेशिक अनुसन्धान समुहबाट तत्काल प्रहरी टोली परिचालन गरी खोज तलासको क्रममा बिहीबार कोशी ब्यारेजको २६ नम्वर ढोकाको पुल माथिबाट वालिकालाई सकुशल उद्दार गरी आफन्तलाई जिम्मा लगाएको छ भने अपहरणमा संलग्न साहलाई नियन्त्रणमा लिएको हो ।
पक्राउ परेका साहको जिल्ला प्रहरी कार्यालय सुनसरीबाट थप अनुसन्धान तथा आवश्यक कानुनी कारवाही भइरहेको जनाइएको छ ।
