कञ्चनरूप, १४ वैशाख । सप्तरीमा अनियन्त्रित भई बस दुर्घटना हुँदा दुई जनाको मृत्यु भएको छ भने आधा दर्जनभन्दा बढी घाइते भएका छन् ।
पूर्वपश्चिम राजमार्ग स्थित सप्तरीको कञ्चनरूप नगरपालिका वडा नम्बर १० बदगामामा आइतबार बिहान १२ बजे गाईघाटबाट फत्तेपुर हुँदै काकडभिट्टा जाँदै गरेको प्र १-०१-००१ ख ३४२० नम्बरको डल्फिन बस अनियन्त्रित भई दुर्घटना हुँदा दुई जनाको मृत्यु भएको हो ।
दुर्घटनामा एक पुरुष र एक महिलाको मृत्यु भएको इलाका प्रहरी कार्यालय कञ्चनपुरका डिएसपी माधव प्रसाद काफ्लेले जानकारी दिनुभयो ।
मृतकहरूको पहिचान खुल्न बाँकी रहेको र दुवैको शव राजविराज स्थित गजेन्द्र नारायण सिंह अस्पताल लगिएको डिएसपी काफ्लेले बताउनुभयो ।
घाइते हुनेहरुमा सप्तरीको सप्तकोशी नगरपालिका–१ का २१ वर्षीया सुबेता दाहाल, सप्तकोशी नगरपालिका–१ का २६ वर्षीया चेतना भट्टराई, झापा ३ निवासी मनोज भट्टराई, मिना भट्टराई, तत्काल नाम, ठेगाना नखुलेका अन्दाजी ७५ वर्षीय पुरुषको अवस्था गम्भीर रहेको र उनलाई गोल्डेन अस्पताल, विराटनगर पठाइएको, उदयपुर, चौदण्डीगढी नगरपालिका–५ निवासी ५९ वर्षीया कमला भुसाल रहेका छन् । उनीहरूको स्थानीय अस्पतालमा उपचार भइरहेको प्रहरीले जनाएको छ ।
दुर्घटनाको कारण हाल अनुसन्धान भइरहेको र विस्तृत विवरण संकलनको कार्य जारी रहेको प्रहरीले जनाएको छ ।
दुर्घटनामा बसका चालक फरार रहेका र खोजतलास कार्य भइरहेको प्रहरीले जनाएको छ ।
