राजविराज, ३१ असार । कञ्चनरूप राइनोज सप्तरीको राजविराजमा जारी सप्तरी प्राइड लिग (एसपिएल) को सेमीफाइनल प्रवेश गरेको छ ।
पब्लिक विन्देश्वरी माध्यमिक विद्यालय राजविराजको खेलमैदानमा मंगलबार सम्पन्न जित्नै पर्ने खेलमा हनुमाननगर हिरोजलाई ४ विकेटले पराजित गर्दै कञ्चनरुप राइनोज सेमिफाइनल प्रवेश गरेको हो ।
कन्चनरुप राइनोजले पाएको ३८ रनको सामान्य लक्ष्य ८. ४ ओभरमा ६ विकेट गुमाएर भेटायो। राइनोजको लागि महानन्द यादवले सर्वाधिक १४ रन योगदान दिए जुन क्रममा १२ बलमा २ चौका र १ छक्का प्रहार गरे। राकेश कामतले ८ रन, रौनक सिंहले ६ रन तथा रिराज साहले ५ रनको योगदान दिए।
हिरोजको बलिंगमा सन्जन बैठाले सर्वाधिक ३ विकेट लिएता पनि जितको लागि पर्याप्त रहेन। २. ४ ओभरमा उनले २२ रन खर्चिए। गोमानन्द अमात्यले २ तथा सन्जिब मण्डलले १ विकेट लिए।
यस अघि टस जितेर ब्याटिंग गरेको हनुमाननगर हिरोजले १०. ३ ओभरमा ३७ रनमा सम्पूर्ण विकेट गुमाउन पुग्यो।
राइनोजका बलर सम्भु मण्डल र अभिमन्यु सरदारले समान ४ विकेट लिंदै हिरोजको इनिंग्स धरासायी बनाए।
प्लेयर अफ द म्याच घोषित मण्डलले ४ ओभरमा २२ रन खर्चिए भने सरदारले ३ ओभरमा ९ रन मात्र खर्चिए। यस्तै मुकेश सिंहले २ विकेट लिए।
उक्त अवसरमा सप्तरी प्रहरी प्रमुख गाैतम कुमार केसीले प्लेयर अफ दि म्याच शम्भु मण्डललाई कप तथा नगद २ हजार १ सयकाे पुरस्कार प्रदान गरे । यसैगरी गेमचेन्जर अभिमन्यु सरदारलाई समाजसेवी खेलानन्द दासले १ हजार ५ सय पुरस्कार प्रदान गरेका थिए।
जितसंगै समुह ‘ए’ अंकतालिकाको दोश्रो स्थानमा रहेर कन्चनरुप राइनोज सेमीफाइनल प्रवेश गरेको हो। उसले ३ खेलमा २ जित र १ हार बेहोर्दै ४ अंक बटुल्न सक्यो। ५ अंक सहित शिर्ष स्थानमा रहेर सेमीफाइनल प्रवेश गरेको राजविराज राजदेवी रोयलले ३ खेलमा २ जित र १ नतिजाविहिन खेल पछि ५ अंक बटुल्न सफल भएको थियो।
राइनोजले सेमीफाइनलमा बुधबार समुह ‘बि’ को विजेता तिरहुट टाइगर्ससंग प्रतिस्पर्धा गर्नेछ भने रोयलले समुह ‘बि’ को उपविजेताको सामना गर्नेछ।
