शिक्षक सेवा आयोगको परीक्षा हलमा जाँदा मोबाइल फोन बोक्न नपाउने

काठमाडौं । विभिन्न तहको शिक्षक पदमा परीक्षा दिन जाने परीक्षार्थीलाई परीक्षा हलमा मोबाइल नलैजान शिक्षक सेवा आयोगले सूचित गरेको छ ।
आयोगले विद्यालय तहका माध्यमिक, निम्न माध्यामिक, प्राथमिक र आन्तरिक प्रतियोगितात्मक बढुवाका परीक्षा सञ्चालन गरिरहेको छ । परीक्षार्थीले परीक्षा हलमा जाँदा मोबाइल फोन लिएर जान नपाउने निर्देशन प्रवेशपत्रमा उल्लेख भए पनि अधिकांश परीक्षार्थीले बोकेको पाइएपछि सूचना निकाल्नुपरेको आयोगले जनाएको छ ।
मोबाइल फोन लगायतका एलेक्ट्रोनिक डिभाइस साथमा नलैजान भन्दै लगेमा परीक्षा केन्द्रमा रहेका कर्मचारीबाट जफत हुन सक्ने सूचनामा जानकारी गराएको छ ।
साथै परीक्षा केन्द्रमा खटिने कर्मचारीहरुले सोही अनुसार आवश्यक व्यवस्था मिलाउन समेत आयोगले सूचनाबाट सूचित गरेको छ ।