सप्तरी प्रहरीद्वारा बालुवा भित्र लुकाई राखेको ८ सय १० किलो गाँजा बरामद

राजविराज, १५ पुष । सप्तरी प्रहरीले ठूलो परिमाणमा लागुऔषध गाँजा बरामद गरेको छ । बरामद लागुऔषध गाँजा जिल्ला प्रहरी कार्यालय सप्तरीले शुक्रबार पत्रकार सम्मेलन गरि सार्वजनिक गरेको छ ।
जिल्ला प्रहरी कार्यालयबाट खटिएको प्रहरी टोलीले ८ सय १० किलो लागुऔषध गाँजा बरामद गरेको हो ।
सप्तरीको हनुमाननगर कंकालिनी नगरपालिका वडा नम्बर १ स्थित कोशी ब्यारेजको गोल घरदेखि अन्दाजी ५ सय मिटर उत्तर पूर्व कोशी भंगालको पूर्व टापुको एकान्त ठाउँ बालुवामा खाल्टो खनि पुरी गाँजाका बोराहरु लुकाई छिपाई राखेको अबस्थामा बरामद भएको प्रहरी जनाएको छ ।

बालुवाभित्र खनि हेर्दा एक ठाउँमा १२ बोरा, दोस्रो ठाउँमा ९ बोरा र तेस्रो ठाउँमा ६ बोरा गरी जम्मा २७ वटा बोरामा लुकाई राखेको गाँजा भेटिएको सप्तरीका प्रहरी प्रमुख अभिनारायण काफ्लेले बताउनु भयो । उहाँले प्रति बोरा ३० केजीका दरले जम्मा ८ सय १० केजी तयारी गाँजा बरामद भएको जानकारी गराउनु भयो ।