कञ्चनरुप नगरपालिकाको स्वास्थ्य शाखामा स्वास्थ्यकर्मीहरुको धर्ना, चरणवद्व आन्दोलनको कार्यक्रम सार्वजनिक

राजकुमार साह /
कञ्चनरुप, २ फागुन । सप्तरीको कञ्चनरुप नगरपालिकाको स्वास्थ्य शाखामा मंगलबार प्रथामिक स्वास्थ्य केन्द्र कञ्चनपुरका स्वास्थ्यकर्मीहरु धर्नामा बसेका छन् ।
वडा नम्बर–८ स्थित रहेको प्राथमिक स्वास्थ्य केन्द्रमा तोडफोड गर्नेमाथि कारबाहीको माग गर्दै स्वास्थ्यकर्मीहरु स्वास्थ्य शाखा अगाडि धर्नामा बसेका हुन ।
एकहप्ता अगाडि स्वास्थ्य केन्द्रमा तोडफोड गर्नेमाथि हालसम्म कानुनी कारबाही अगाडि नबढाएकोले धर्ना बस्न बाध्य भएको आन्दोलनरत स्वास्थ्यकर्मीहरुले बताए । प्राथमिक स्वास्थ्य केन्द्र आबद्ध स्वास्थ्यकर्मीले चरणवद्व आन्दोलनको कार्यक्रम सार्वजनिक गर्दै स्वास्थ्य शाखामा धर्ना बसेका छ्न ।आन्दोलनरत स्वास्थ्यकर्मीहरुले तोडफोडमा संलग्न व्यक्तिहरुलाई कारबाही नगरे सशक्त आन्दोलन गर्ने चेतावनी दिए ।

गत माघ २२ गते कार्यपालिका सदस्य तनुकलाल शर्मा बरहिसहितका व्यक्तिहरुले उपचारको बहानामा इमर्जेन्सी सेवामा तोडफोड गरेको स्वास्थ्यकर्मीहरुले आरोप लगाएका छ्न । उनीहरुले प्राथमिक स्वास्थ्य केन्द्रमा तोडफोड गर्नेमाथि कारबाहीको माग राखी माघ २७ गते स्वास्थ्य शाखा प्रमुखलाई ४ बुंदे मागसहित २४ घण्टाको अल्टिमेटम दिएका थिए ।
उक्त माग सम्बोधन नहुदा धर्नामा बस्न बाध्य भएको इमर्जेन्सीका इन्चार्ज श्यामसुन्दर साहले जानकारी दिए । स्वास्थ्यकर्मीहरुले पहिलो चरण अन्तर्गत फागुन २ गते देखि ५ गतेसम्मको विभिन्न माँग राखी ४ दिने आन्दोलनका कार्यक्रम सार्वजनिक गरेका छ्न ।
आन्दोलनका कार्यक्रम अन्तर्गत फागुन २ गते स्वास्थ्य शाखामा धर्ना बस्ने, फागुन ३ गते कञ्चनरुप नगरपालिका स्वास्थ्य शाखामा तालाबन्दी गर्ने र प्रथामिक स्वास्थ्य केन्द्र कञ्चनपुरमा ईमेरजेन्सी सेवा बन्द गरि धर्ना बस्ने, फागुन ४ र ५ गते नगरपालिका अन्तर्गतका सम्पुर्ण स्वास्थ्यसंस्थाहरु बन्द गरि धर्ना बस्ने, माग सम्बोधन नभएमा फागुन ५ गते थप आन्दोलनका कार्यक्रम गर्ने जनाएको छ ।