सप्तरीको तिरुहुत गाउँपालिकामा आगलागी हुँदा १६ घर जलेर नष्ट हुनुका साथै लाखौंको क्षति

राजविराज, २६ फागुन । सप्तरीको तिरुहुत गाउँपालिकामा आगलागी हुँदा १६ घर जलेर नष्ट हुनुका साथै लाखौंको क्षति भएको छ ।
जिल्लाको तिरुहुत गाउँपालिका ५ स्थित लोहजरामा शुक्रबार साँझ भीषण आगलागीमा परी ६ परिवारको १६ घर जलेर नष्ट हुँदा लाखौंको क्षति भएको हो। रामकिसुन मरैताको घरबाट आगलागी सुरु भएको थियो।
आगलागीमा रामकिसुन मरैताको ४ वटा घर, सत्यनारायण ठाकुरको ४ वटा घर, हरि नारायण ठाकुरको ३ वटा घर, देव नारायण ठाकुरको २ वटा घर, उपेन्द्र ठाकुरको २ वटा घर र गोसाई अरगरियाको एउटा गरि १६ वटा घर जलेर नष्ट भएको स्थानिय अरविन यादवले जानकारी दिनुभयो ।

आगलागीबाट नगद, गरगहना, भाँडाकुँडा, अन्नपात, लत्ताकपडा गरि ठूलो परिमाणमा धनसम्पत्ती जलेर नष्ट भएको उहाँले बताउनु भयो ।
५० लाख भन्दा बढीको धनसम्पत्ती जलेर नष्ट भएको हुन सक्ने स्थानीयले अनुमान गरेका छन् ।
आगो कञ्चनरुप, राजविराज, हनुमाननगर र शम्भुनाथ नगरपालिकाबाट आएको बारुण यन्त्रको सहयोगमा नियन्त्रणमा लिएको प्रहरीले जनाएको छ ।