काठमाडौं । प्रधानमन्त्रीको सरकारी निवास बालुवाटारमा पिपुल्स लाइब्रेरीका लागि पुस्तक सङ्कलन गर्ने काम सुरु भएको छ । प्रधानमन्त्री पत्नी राधिका शाक्यले आइतबारबाट पुस्तक लिन सुरु गर्नुभएको हो ।
शाक्यले वरिष्ठ मुटुरोग विशेषज्ञ डा. भगवान् कोइरालाद्वारा लिखित पुस्तक ‘हृदय’ बुझेर पुस्तक सङ्कलनको काम प्रारम्भ गर्नुभएको हो ।
पुस्तक हस्तान्तरण गर्न डा. कोइराला प्रधानमन्त्रीको सरकारी निवास बालुवाटार पुग्नु भएको थियो । स्रष्टा र इच्छुक व्यक्तिहरूले दिनुभएको पुस्तक अब दैनिक एक घण्टा सङ्कलन गरिने भएको छ ।
पुस्तक प्रधानमन्त्री पत्नी राधिकाले आफैँ सङ्कलन गर्नुहुने भएको छ । ‘पुस्तक रिसिभ गर्ने काम भोलिदेखि शनिबार बाहेक हरेक दिन दिउँसो ३ बजेदेखि ४ बजेसम्म हुने छ, पुस्तक हस्तान्तरण गर्नका लागि प्रधानमन्त्री निवासको ३ नम्बर गेटमा आउन सक्नु हुनेछ’, प्रधानमन्त्री केपी शर्मा ओलीले सामाजिक सञ्जाल फेसबुक मार्फत जानकारी दिनुभएको छ ।
प्रधानमन्त्री सरकारी निवास बालुवाटारमा लाइब्रेरीको लागि कोठा बनाइएको भए पनि लाइब्रेरीमा राखिएका र्याग खालि थिए ।
सो पुस्तकालयलाई नागरिक पुस्तकालय बनाउन प्रधानमन्त्री पत्नीले पुस्तक सङ्कलन गर्न सुरु गर्नुभएको हो । प्रधानमन्त्री जो भए पनि उहाँहरूलाई भेट्ने जाने वा बालुवाटार जाने जो कोहीले पनि पढ्न पाउन् भन्ने उद्देश्यले उहाँले पुस्तकालय बनाउने काम सुरु गर्नुभएको हो ।
बालुवाटारसम्म आएर पुस्तक प्रदान गर्नुभएकोमा शाक्यले डा. कोइरालालाई धन्यवाद दिनुभयो ।
डा. कोइरालाले संस्थागत हिसाबले लाइब्रेरीलाई सुहाउने गरी पुस्तक प्रदान गरिएको बताउनुभयो । प्रधानमन्त्रीको सरकारी निवासमा अरूलाई पनि उपलब्धता हुने गरी पुस्तकालय सञ्चालन गरिनु राम्रो काम भएको कोइरालाले बताउनुभयो ।
केही असल सन्देश दिने खालका किताबहरू छन् भने तपाईँ हामी सबैले आफ्नो तर्फबाट सहयोग गर्दा भविष्यमा एउटा ठुलो योगदान यो समाजलाई पुग्न सक्ने डा. कोइरालाले बताउँनुभयो ।
