सप्तरी, १८ साउन । सप्तरीमा प्रहरीले हवाई फायर गरेर दुई जना लागुऔषध कारोबारीलाई आज नियन्त्रणमा लिएको छ । पक्राउ पर्नेमा सप्तरीको छिन्नमस्ता गाउँपालिका- १ बरही बिरपुरका विशाल राय र डाक्नेश्वरी नगरपालिका–७ का मनोज राय छन् । जिल्लाको छिन्नमस्ता गाउँपालिका १ बरहीबिरपुरबाट उनीहरुलाई पक्राउ गरिएको प्रहरीले जनाएको छ ।
आरोपीहरूलाई नियन्त्रणमा लिने क्रममा दुई राउन्ड हवाई फायर गरिएको एसपी गौतमकुमार केसीले बताउनुभयो । आरोपीहरू भाग्न खोजेपछि हवाई फायर गरी नियन्त्रणमा लिएको उहाँले बताउनुभयो ।
प्रहरीले उनीहरूको साथबाट करिब १ सय ग्राम खैरो हेरोइन बरामद गरेको छ ।
ब्युरोबाट खटिएको टोलीले स्थानीय प्रहरीसँगको समन्वयमा आरोपीहरूलाई नियन्त्रणमा लिएर अनुसन्धान गरिरहेको छ ।
