कञ्चनरूप (सप्तरी), २८ कात्तिक। तराई–मधेशसहित देशभर सूर्य उपासनाको महापर्व छठ श्रद्धा, भक्ति र निष्ठाका साथ मनाइँदैछ। चार दिवसीय छठ पर्वअन्तर्गत आज दोस्रो दिन व्रतालुहरूले खरना विधि श्रद्धापूर्वक सम्पन्न गर्दैछन्।
छठ पर्वको पहिलो दिन शुक्रबार नहाय–खाय विधि सम्पन्न गरेका व्रतालुहरू आज दिनभर उपवास बसेका छन्। साँझपख स्नान गरी शुद्ध वस्त्र धारण गरेर पूजा–आराधना गरेपछि खीर, रोटी तथा अन्य शुद्ध शाकाहारी परिकारलाई प्रसादका रूपमा ग्रहण गरी खरना विधि सम्पन्न गरिने परम्परा रहेको छ।
खरना विधि सम्पन्न भएसँगै व्रतालुहरूको कठिन ३६ घण्टे निर्जल उपवास सुरु हुनेछ। यस अवधिमा व्रतालुहरूले पानीसमेत ग्रहण नगरी कठोर नियम र निष्ठाका साथ छठी माताको पूजा आराधना गर्ने धार्मिक मान्यता छ।
खरना पूजाका लागि घरघरमा पूजा स्थल सजाइएको छ भने छठी माताको आराधना गर्दै परिवारको सुख, शान्ति, समृद्धि, सुस्वास्थ्य तथा सन्तानको दीर्घायुको कामना गरिँदैछ।
यसैबीच, छठ पर्वको मुख्य दिन भोलि आइतबार साँझ अस्ताउँदो सूर्यलाई पहिलो अर्घ्य अर्पण गर्ने तयारी तीव्र पारिएको छ। नदी, पोखरी तथा विभिन्न जलाशयका किनारमा छठघाट निर्माण, सरसफाइ, सजावट तथा व्यवस्थापनका काम अन्तिम चरणमा पुगेका छन्।
छठ पर्वले धार्मिक आस्था, सामाजिक सद्भाव, पारिवारिक एकता र प्रकृतिप्रतिको सम्मानलाई उजागर गर्ने विश्वास गरिन्छ। सूर्यदेव र छठी माताको उपासनासँग जोडिएको यस पर्वमा जातजाति, भाषा र समुदायबीच आपसी सद्भाव तथा एकताको सुन्दर सन्देशसमेत प्रवाह हुने गरेको छ।
छठ पर्वको अवसरमा सम्पूर्ण नेपाली दाजुभाइ तथा दिदीबहिनीहरूमा हार्दिक मंगलमय शुभकामना।
