कञ्चनरूप, २६ कात्तिक । सप्तरीको बलान बिहुल गाउँपालिका–४ स्थित सिरहा र सप्तरी जिल्लाको सिमानामा पर्ने बलान खोलाको बीचबाट प्रहरीले २३१ किलो ८०० ग्राम गाँजा बरामद गरेको छ ।
प्रहरीका अनुसार बुधबार राति करिब १ बजे बलान खोलाको बीचमा खाल्डो खनेर गाँजा लुकाई राखिएको विशेष सूचनाका आधारमा प्रहरी टोलीले उक्त स्थानमा खानतलासी गरेको थियो । सो क्रममा खाल्डोभित्र लुकाएर राखिएको गाँजाजस्तो देखिने पदार्थ फेला परेको हो ।
बरामद गरिएको गाँजाको तौल २३१ किलो ८०० ग्राम रहेको प्रहरीले जनाएको छ ।
गाँजा लुकाएर राख्ने कार्यमा संलग्न कुनै पनि व्यक्ति घटनास्थलमा फेला नपरेको प्रहरीले जनाएको छ । बरामद गाँजाबारे थप अनुसन्धान भइरहेको र संलग्न व्यक्तिहरूको खोजी भइरहेको प्रहरीले जानकारी दिएको छ ।
विज्ञापन
