नवलपरासी, ३० कार्तिक । नवलपरासी (बर्दघाट सुस्ता पूर्व) को कावासोतीमा यात्रुवाहक बस दुर्घटना हुँदा २५ जना घाइते भएका छन् ।
सोमबार बिहान करिब ६ः४० बजे कावासोती नगरपालिका–११ लोकाहास्थित पूर्व–पश्चिम राजमार्गमा धनगढीबाट काठमाडौं जाँदै गरेको यात्रुवाहक बस दुर्घटनामा परेको हो ।
सुदूरपश्चिम प्रदेश ०१–००१ ख ३४७५ नम्बरको उक्त बस चालकले नियन्त्रण गुमाउँदा सडकमा पल्टिएको बताइएको छ ।
दुर्घटनामा बसमा सवार २५ जना यात्रु सामान्य तथा मध्यम घाइते भएका छन् । घाइतेहरूलाई तत्काल उद्धार गरी उपचारका लागि मध्यविन्दु प्रादेशिक अस्पताल, डण्डा पठाइएको छ ।
दुर्घटनामा घाइते भएकाहरूको विस्तृत विवरण आउन बाँकी रहेको प्रहरीले जनाएको छ । घटनाबारे थप अनुसन्धान भइरहेको छ ।







