कञ्चनरूप, १९ भदौ । सप्तरी निर्वाचन क्षेत्र नम्बर ४ (ख) बाट प्रदेश सभा सदस्य पदमा निर्वाचित स्वतन्त्र सांसद अनिरुद्ध कुमार सिंह यादव कारागार चलान भएका छन् ।
नेकपा माओवादीका नेता गोविन्द चौधरीको हत्यामा संलग्न रहेको घटनामा उनीविरूद्व कर्तव्य ज्यान तथा डाँका मुद्दा परेको थियो ।
मुल्तबीमा राखिएको मुद्दामा उनलाई मंगलबार सप्तरी जिल्ला अदालतमा पेश गर्दा अदालतले पुर्पक्षका लागि थुनामा पठाउने आदेश दिएको छ ।
निज प्रतिवादिलाई मुलुकि फौजदारी कार्यविधि संहिता, २०७४ बमोजिम मुद्दा पुर्पक्षको लागि थुनामा राख्न पठाउनु भन्ने आदेश भएको हुँदा उल्लेखित प्रतिवादिलाई सप्तरी कारागार कार्यालय राजविराजमा पठाईएको जिल्ला प्रहरी कार्यालय सप्तरीले जनाएको छ ।
अनिरुद्धकुमारलाई सोमबार प्रहरीले राजविराजबाट नियन्त्रणमा लिएको थियो ।
शम्भुनाथ नगरपालिका १ खोक्सर प्रवाहाका ३२ वर्षीय दिपु भन्ने गोविन्द चौधरीको २०६४ असार ९ गते बोदे बरसाइन नगरपालिका २ नेङ्गडा बैरिया टोलमा अपहरणपश्चात गोली हानी हत्या गरिएको थियो। अदालतमा अभियोगपत्र दायर भए पनि यादव अदालतमा उपस्थित नभएर फरार रहेका थिए।
Add Comment