बालविवाह गर्ने बालिकालाई ३ महिना कैद सजाय गरी स्थगन

सप्तरी । सप्तरी जिल्ला अदालतले बालविवाह आरोपमा गिरफ्तार भएकी १७ वर्षीया बालिकालाई बुधबार ३ महिना कैद सजायको फैसला गरेको छ ।
जिल्ला न्यायाधीश हेमन्त रावलको इजलाशले बालिकालाई ३ महिना कैद सजाय गरी सजाय स्थगनको फैसला समेत भएको छ ।
भारतको जम्मु कश्मिर राज्य श्रीनगर अविकरपोरा पालामोराका ४१ वर्षीय गुलाम जिलानीसँग २०७९ माघ ८ गते राजगढ गाउँपालिका–२ इनर्वामा घरपरिवारको सहमतिमा विवाह भएको बालिकाले वयान दिनु भएको छ ।
भारत जाँदै गरेको अवस्थामा सशस्त्र प्रहरी बल नेपाल बोर्डर आउट पोष्ट बनैनियाको टोलीले माघ १३ गते बालिकासहित, जिलानीलाई नेपाल ल्याएर विवाह गराउने भारत जम्मु काश्मिर राज्य रैनवारीका ४० वर्षीय मो।रफिक खार र उनकी पत्नी २७ वर्षीया नुर जहानलाई गिरफ्तार गरेको थियो ।
सशस्त्र इन्स्पेक्टर तुलसीराम कार्कीको माघ १४ गतेको प्रतिवेदनका आधारमा जिल्ला प्रहरी कार्यालयले बालिका, जिलानी, खार र जहानविरुद्ध माघ १४ गते उजुरी दर्ता गरेको थियो । राजीखुशीले विवाह भएकाले बालिकाका अभिभावकले उजुरी दिन अस्विकार गरे ।
जिल्ला अदालतमा विवाहका लागि सहमति दिने बालिकाको ४४ वर्षीय बुवा र ४२ वर्षीय आमासमेत ६ जनामाथि जिल्ला सरकारी वकिलको कार्यालयले फागुन ५ गते अभियोगपत्र दायर गरेको थियो ।
जिल्ला न्यायाधीश रावलको इजलाशले बालिकालाई ३ महिना कैद गरी सजाय स्थगनको फैसला गर्नुका साथै गिरफ्तार अन्य तीन जना आरोपितहरुलाई फागुन ११ गते पुर्पक्षका लागि राजविराज कारागारमा थुनामा पठाएको छ ।
फरार रहेका बालिकाका बुवा र आमाविरुद्ध वारेण्टसहितको म्यादी पुर्जी जारी भएको छ ।