२० तोला सुन र ३६ केजी चाँदी चोरीमा संग्लग्न ३ जना पक्राउ

बिराटनगर, जेठ ११ गते । मोरङ प्रहरीले सुन र चाँदी चोरीमा संग्लग्न रहेको आरोमा ३ जनालाई पक्राउ गरेको छ । पक्राउ पर्नेहरुमा बिराटनगर १२ का २१ वर्षीय राज कुमार कामत, १९ वर्षीय बिबेक कामत र २२ वर्षीय श्रीकान्त दास रहेका छन् ।
उनीहरुलाई जिल्ला प्रहरी कार्यालय मोरङले आज पत्रकार सम्मेलन मार्फत सार्वजानिक गरेको हो ।
जेठ ३ गते बिराटनगर महानगरपालिका ३ का जय किशोर चौधरीको घरमा चोरी भएको सूचना पाएसंगै तत्काल घटनास्थलमा खटिएको प्रहरी टोलीले अनुसन्धान शुरु गरेको थियो । चौधरीको घरबाट २० तोला सुन र ३६ केजी चादी चोरी भएको जानकारी पाएसंगै जिल्ला प्रहरी कार्यालय मोरङले उक्त घटनाको अनुसन्धानको लागी ८ जनाको अनुसन्धान टोली परिचालन गरेको र सुक्ष्म अनुसन्धानको क्रममा घटनामा संग्लग्न ३ जनालाई जेठ १० गते राती पक्राउ गरेको हो ।
जयकिशोर चौधरी र ज्योती प्रसाद खाँले साझेदारीमा ज्वलर्स संचालन गर्ने गरेको र ज्वलर्सका समानहरु चौधरीको घरमा राख्ने गरेकोमा घरैबाट चोरी भएको थियो ।
चोरीमा संग्लग्न ब्यक्तिहरु पिडितका छिमेकी वा चिनेजानेकै ब्यक्तिहरु भएको आशंकामा अनुसन्धान शुरु गरेको प्रहरी टोलीले घटनास्थल आसपासका केही ब्यक्तिहरुको निरन्तर निग्रानी गर्ने क्रममा उनीहरुलाई पक्राउ गर्न सफल भएको हो ।
पक्राउ परेका ब्यक्तिहरु मध्ये बिबेक कामत चोरी मुद्धामा ९ महिनाको सजाय भुक्तान गरेर यही बैशाख २८ गते छुटेका र श्रीकान्त दास डाका मुद्धामा २० महिनाको सजाय भुक्तान गरी गत असोज ३ गते छुटेका हुन् ।
यिनीहरुले चोरी गरेको मध्ये सुन भारतिय बजार बेचेको र ३५ केजी चाँदी प्रहरीले बरामद गरेको जिल्ला प्रहरी कार्यालय मोरङले जनाएको छ । पक्राउ परेका उनीहरुको साथबाट प्रहरीले ३५ केजी चादी सहित भारतिय रुपैयाँ २ हजार ५ सय, नेपाली रुपैयाँ १ हजार ७ सय ३० र २ थान मोवायल समेत बरामद गरेको छ ।
घटना सम्बन्धमा थप अनुसन्धान भईरहेको उक्त कार्यालयले जनाएको छ ।