मकवानपुर । मकवानपुरमा यात्रुवाहक माइक्रोबस दुर्घटना हुँदा चालकसहित १० जनाको मृत्यु भएको छ भने पाँच जना घाइते भएका छन् ।
जिल्लाको भीमफेदी गाउँपालिका–६ चिसापानी गढीस्थित भीमफेदी–कुलेखानी–काठमाडौं सडकखण्डमा बिहीबार बिहान यात्रुवाहक माइक्रोबस करिब ५०० मिटर तल भिरमा खस्दा भीषण दुर्घटना भएको हो ।
प्राप्त जानकारीअनुसार आज बिहान करिब ५ः४५ बजे काठमाडौंबाट सर्लाहीतर्फ जाँदै गरेको मधेश प्रदेश ०३–००१ ज ०८८० नम्बरको माइक्रोबस अनियन्त्रित भई सडकबाट तल भिरमा खसेको थियो ।
दुर्घटनाको समयमा माइक्रोबसमा चालकसहित १४ जना सवार रहेको प्रारम्भिक विवरण प्राप्त भएको छ । दुर्घटनामा चालकसहित १० जनाको घटनास्थलमै मृत्यु भएको र पाँच जना घाइतेको उद्धार गरिएको जनाइएको छ ।
घाइतेहरूलाई उद्धार गरी उपचारका लागि पठाइएको छ । मृतक तथा घाइतेहरूको पहिचान, दुर्घटनाको कारण र घटनाबारे थप विस्तृत विवरण आउन बाँकी रहेको छ ।
