राजविराज । सप्तरीको राजविराजस्थित हुलाकी सडक अन्तर्गत सिरहा रोडको अतिक्रमण गरी बनाइएको अवैध संरचना राजविराज नगरपालिकाले आजदेखि भत्काउन सुरु गरेको छ ।
सूचना जारी गर्दा पनि खाली नगरिएको अवैध संरचना डोजर लगाएर भत्काउन सुरु गरिएको नगरपालिकाले जनाएको छ ।
राजविराज नगरपालिका वडा नम्बर ६ र ७ मा पर्ने सिरहा रोड स्थित हुलाकी सडकको दुबै पट्टी ९÷९ मिटर जग्गा खाली गराउन नगरपालिकाले डोजर चलाएको हो।
राम मन्दिरदेखि छिन्नमस्ता डेरीसम्मको सडक फराकिलो पार्न अतिक्रमित संरचना हटाउन लागेको नगरपालिकाकी कार्यवाहक नगर प्रमुख इसरत परविनले बताउनु भयो । सात दिनभित्र अतिक्रमित घर, टहरा हटाउन नगरपालिकाले दिएको समय सीमा शनिबार सकिएपछि सडक विस्तारका लागि डोजरले अतिक्रमित संरचना भत्काउन लागेको उहाँले बताउनु भयो ।
कार्यवाहक नगर प्रमुख परविनले अब हुलाकी सडकअन्तर्गत राजविराजको हनुमान मन्दिरदेखि पूर्व कञ्चनपुर सडकको अतिक्रमित संरचना हटाउने जानकारी दिनु भयो ।
यसअघि गत साउन १२ गते नगरपालिकाले राजविराज हटियाभित्रको अतिक्रमित संरचना हटाएको थियो ।
