कञ्चनरुप, २६ फागुन । सप्तरीको कुनौली–राजविराज सडकखण्ड अन्तरगत तिलाठी कोइलाडी गाउँपालिका १ स्थित लचका पुलमुनि मोटरसाइकल सहित एक पुरुषको शव आज फेला परेको छ ।
जिल्लाको राजविराज नगरपालिका १६ बस्ने राजेशकुमार यादवलाई पुलमुनि मृत अवस्थामा मोटरसाइकलसहित भेटिएको प्रहरीले जनाएको छ । पुलमुनि म. प्र ३०६१ नम्बरको मोटरसाइकलसहित उनको शव भेटिएको सप्तरीका प्रहरी प्रबक्ता डिएसपी ढुण्डिराज न्यौपानेले बताउनुभयो ।
दुर्घटनामा परेर ज्यान गएको हुन सक्ने डिएसपी न्यौपानेले जानकारी दिनुभयो ।
शनिबार बिहान नदीमा शव देखेपछि स्थानीयवासीले प्रहरीलाई खबर गरेका थिए । कुन कारणले कसरी दुर्घटना भयो भन्ने कुरा अहिलेसम्म नखुलेको प्रहरीको भनाइ रहेको छ । घटना बारेमा प्रहरीले अनुसन्धान थालेको जनाएको छ ।
मृतकको शव परीक्षणका लागि गजेन्द्रनारायण सिंह अस्पताल राजविराज पठाइएको जिल्ला प्रहरी कार्यालय सप्तरीले जनाएको छ ।
