कञ्चनरूप, ३१ भदौ । सप्तरीको बोदेबर्साईन नगरपालिका–१० अमरैयामा मंगलबार बिहान चट्याङ लागेर बुवा–छोरीको मृत्यु भएको छ ।
मृत्यु हुनेमा स्थानीय ५५ वर्षीय भोला साह र उनकी १८ वर्षीया छोरी मधु कुमारी साह रहेका छन् ।
प्रहरीका अनुसार मंगलबार बिहान करिब १० बजे बुवा–छोरी आफ्नै खेतमा धान गोड्ने काम गरिरहेका बेला अचानक चट्याङ परेको थियो । चट्याङ लागेर दुवै जना खेतमै ढलेका थिए र घटनास्थलमै उनीहरूको मृत्यु भएको हो ।
स्थानीयवासीले खेतमा बुवा–छोरीलाई लडिरहेको अवस्थामा देखेपछि प्रहरीलाई खबर गरेका थिए । खबर प्राप्त हुनासाथ इलाका प्रहरी कार्यालय कडरबोनाबाट प्रहरी टोली घटनास्थलमा पुगेको थियो । घटनास्थलमा पुगेर जाँच गर्दा दुवै जनाको मृत्यु भइसकेको अवस्थामा फेला परेको जिल्ला प्रहरी कार्यालय सप्तरीले जनाएको छ ।
मृतक दुवै जनाको शव परीक्षणपछि आवश्यक कानुनी प्रक्रिया पूरा गरी परिवारको जिम्मा लगाइएको प्रहरीले जनाएको छ । घटनाबारे थप अनुसन्धान भइरहेको जिल्ला प्रहरी कार्यालय सप्तरीले जनाएको छ ।
