काठमाडौं, १ असोज । अख्तियार दुरुपयोग अनुसन्धान आयोगले नौ लाख रुपैयाँ घुससहित नापी कार्यालय डिल्लीबजारका नापी अधिकृतलाई पक्राउ गरेको छ।
जिल्ला काठमाडौं, नापी कार्यालय डिल्लीबजारअन्तर्गतको नं. ३ नापी टोली माछापोखरीका टोली प्रमुख नापी अधिकृत डिल्लीबहादुर वलीले छुट जग्गा दर्ता सिफारिससहितको मिसिलपत्र भूमि प्रशासन कार्यालय, मनमैजु काठमाडौंमा पठाउन अनावश्यक सास्ती, दुःख र हैरानी दिई घुस/रिसवत माग गरिरहेको भन्ने सूचना एवं उजुरीका आधारमा अख्तियारले अनुसन्धान अघि बढाएको थियो।
अख्तियार दुरुपयोग अनुसन्धान आयोग, टंगालबाट खटिएको टोलीले वलीलाई नौ लाख रुपैयाँ घुस/रिसवतसहित पक्राउ गरेको हो। उनलाई २०८३ साल भदौ ३१ गते काठमाडौंको टोखा नगरपालिका–५, बसुन्धारास्थित एक रेस्टुरेन्टबाट रकमसहित नियन्त्रणमा लिइएको आयोगले जनाएको छ।
पक्राउ परेका वलीविरुद्ध घुस/रिसवतसम्बन्धी भ्रष्टाचार मुद्दामा अनुसन्धान भइरहेको छ। आयोगका अनुसार २०८३ असोज १ गते विशेष अदालतको आदेशबाट म्याद थप भई थप अनुसन्धान कार्य अगाडि बढाइएको छ।
आयोगका प्रवक्ता सुरेश न्यौपानेद्वारा जारी प्रेस विज्ञप्तिमा उक्त जानकारी सार्वजनिक गरिएको हो।
