कञ्चनरूप, १० पुस । नेकपा एमाले जिल्ला कार्य समिति सप्तरीले नेपाल पत्रकार महासंघ शाखा सप्तरीका नवनिर्वाचित पदाधिकारीहरुलाई सम्मान गरेको छ । एमाले जिल्ला उपाध्यक्ष अव्दुल मज्जीत साकिरको अध्यक्षता तथा एमाले पोलिटव्यूरो सदस्य सुमनराज प्याकुरेलको प्रमुख आतिथ्यमा राजविराजमा बुधबार आयोजित एक समारोहका वीच महासंघका नवनिर्वाचित पदाधिकारीहरुलाई सम्मान गरिएको हो ।
नेपाल पत्रकार महासंघको मंसिर २८ गते सम्पन्न निर्वाचनबाट निर्वाचित मधेस प्रदेश उपाध्यक्ष अम्विका दाहाल, जिल्ला शाखा अध्यक्ष श्रवण कुमार देव, उपाध्यक्ष सुधा देव,, सचिव खगेन्द्र कार्की, सह सचिब कृष्ण कुमार मण्डल, सह सचिव(समाबेशी) डम्बर राई, कार्यसमिति सदस्य बृजमान तामाङ, रक्षा चौधरी, अरुण कुमार यादव, परिष कुमार कर्ण, नर्मदेव यादव शिवप्रसाद आचार्य, उत्तम प्रसाद आचार्य, रामनारायण यादवलाई प्रमुख अतिथि नेता प्याकुरेलले प्रशंसा पत्र र टीक गम्छा ओढाएर सम्मान गर्नुभयो ।
यसैगरी राष्ट्रिय परिषद सदस्य मनोज कुमार माझी, प्रदेश परिषद सदस्य गणेशलाल देव, नरेश कुमार चौधरी, शैलेन्द्र झा, लोकेन्द्र यादव लगायतकालाई समेत नेता प्याकुरेलले प्रमाणपत्र, टीका, गम्छा ओढाएर सम्मान गर्नुभएको छ ।
नेता प्याकुरेलले नवनिर्वाचित पदाधिकारीलाई बधाई तथा शुभकामना दिंदै पत्रकारहरुको पेशागत सुरक्षा र पत्रकारिता क्षेत्रको समग्र विकासमा सहयोग गर्ने प्रतिबद्धता व्यक्त गर्नुभयो । पत्रकारहरुलाई एमालेको आलोचनात्मक समाचार सम्प्रेषण गर्न आग्रह गर्दै एमाले पोलिटव्यूरो सदस्य समेत रहनुभएको उहाँले जिल्लाको विकास तथा समृद्धिका लागि पत्रकारहरुसंग सहकार्य गरेर अगाडि बढ्ने बताउनुभएको छ ।
नेपाल पत्रकार महासंघ सप्तरीका अध्यक्ष श्रवण कुमार देवले पत्रकारहरुलाई सम्मान गरेकोमा खुशी व्यक्त गर्दै पत्रकारहरुको क्षमता विकास तथा संस्थागत विकासमा सहयोगका लागि आग्रह गर्नुभयो । उहाँले अघिल्लो कार्यकालमा पूर्वाधारमा राम्रो काम गर्न सफलता हाँसिल भएपनि मिडियाको वृत्ति विकासका काम गर्न नसकिएको स्वीकार गर्नुभयो । आर्थिक अभाव खेपिरहेका मुलधारका मिडियाहरुको सवलीकरण गर्ने तथा श्रमजीवी पत्रकारको हकहित हुने योजनाकासाथ नयाँ कार्यसमिति अगाडि बढ्ने बताउँदै अध्यक्ष देवले प्रदेश सरकार तथा स्थानीय सरकारले दिने विज्ञापनका लागि आबश्यक पहल गरिदिन भन्दै नेता प्याकुरेलको ध्यानाकर्षण समेत गराउनु भयो ।
कार्यक्रममा नेपाल पत्रकार महासंघ मधेस प्रदेशकी उपाध्यक्ष अम्विका दाहाल, प्रेस चौतारी नेपालका केन्द्रीय सदस्य एवम् नवनिर्वाचित सचिव खगेन्द्र कार्की, नेपाल प्रेस युनियन सप्तरीका अध्यक्ष विनयलाल कर्ण लगायतकाले शुभकामना मन्तव्य व्यक्त गर्नुभयो ।
नेकपा एमाले जिल्ला कार्यसमिति उपसचिव एवम् प्रचार विभाग प्रमुख अखलेश कुमार झाद्वारा संचालित कार्यक्रममा स्वागत सचिब देवनाथ यादवले गर्नुभएको थियो ।
