सप्तरीमा दुई वटा मोटरसाईकल एक आपसमा ठोक्किँदा तीन जना युवकको मृत्यु

सप्तरी, १० वैशाख । सप्तरीमा दुई वटा मोटरसाईकल एक आपसमा ठोक्किँदा तीन जना युवकको मृत्यु भएको छ ।
मृत्यु हुनेमा हनुमाननगर कंकालिनी नगरपालिका – ३ का ३० वर्षीय पप्पु यादव, २६ वर्षीय संदिप यादव र २८ वर्षीय रंजित यादव रहेको जिल्ला प्रहरी कार्यालय सप्तरीले जनाएको छ ।
शुक्रवार मध्यराति जिल्लाको राजगढ गाउँपालिका–५ मलेकपुर स्थित हुलाकी सडक खण्डमा पश्चिम तर्फ जादै गरेको प्र १–०२४१ प २२९६ नम्बरको मोटरसाइकल र सोही दिशाबाट जादै गरेको प्र १–०२०४१ प ९५२४ नम्बरको मोटरसाइकल एक आपसमा ठोक्किँदा दुर्घटना भएको थियो ।
मोटरसाइकल एक आपसमा ठोक्किँदा मोटरसाइकलमा सवार उनीहरु गम्भीर घाइते भएका थिए ।
उनीहरुलाई उपचारको लागि गजेन्द्र नारायण सिंह अस्पताल राजविराज लग्दा चिकित्सकले मृत घोषणा गरेको सप्तरीका प्रहरी प्रवक्ता डिएसपी माधव प्रसाद काफ्लेले जानकारी दिनुभयो ।
तिव्र गतिमा मोटरसाईकल हाक्ने प्रतिष्पर्धा गर्दा दुर्घटना भएको हुन सक्ने प्रहरीको अनुमान छ ।